ස්ත්‍රීන්ගේ ආර්ථික ස්වාධීනත්වය වෙනුවෙන් ව්‍යාපාර ලියාපදිංචියට සහාය වීම
Sisterhood හි අපගේ විශ්වාසය වන්නේ ස්ත්‍රීන්ගේ සැබෑ සවිබල ගැන්වීම සඳහා ඔවුන්ගේ අයිතිවාසිකම් පිළිබඳ දැනුවත්භාවය මෙන්ම ආර්ථික සම්පත්, වෙළෙඳපොළ අවස්ථා සහ ආයතනික සහාය වෙත ප්‍රවේශය ද තහවුරු කළ යුතු බවයි.
ස්ත්‍රීන්ගේ ආර්ථික ස්වාධීනත්වය තහවුරු කිරීම යනු ඔවුන්ට ආදායමක් උපයා ගැනීමට අවස්ථා සැලසීම පමණක් නොවේ. තමන්ගේම ව්‍යාපාරයක් පවත්වාගෙන යාමට, එය විධිමත් ව්‍යාපාරයක් ලෙස ගොඩනඟා ගැනීමට සහ ආර්ථික තීරණ ස්වාධීනව ගැනීමට අවශ්‍ය දැනුම, කුසලතා සහ අවස්ථා ලබාදීම ද ඒ සඳහා අත්‍යවශ්‍ය වේ. මෙම අරමුණ පෙරදැරි කරගනිමින් Sisterhood සංවිධානය විසින් ස්වයං රැකියාවල නිරත වන ස්ත්‍රීන්ගේ ව්‍යාපාර ලියාපදිංචි කිරීම සඳහා සහාය වැඩසටහනක් ක්‍රියාත්මක කරන ලදී.
මෙම වැඩසටහන සඳහා සහභාගී වන ස්ත්‍රීන් තෝරාගනු ලැබුවේ ගිංතොට ප්‍රදේශයේ ක්‍රියාත්මක වන 'අනං මනං පොළ' සමඟ සම්බන්ධ වී කටයුතු කරන ව්‍යවසායිකාවන් අතරිනි.
'අනං මනං පොළ' යනු ගෘහස්ථව නිෂ්පාදන සිදුකරන, මැහුම් ගෙතුම් කටයුතුවල නිරත වන සහ විවිධ කුඩා ව්‍යාපාර පවත්වාගෙන යන ග්‍රාමීය ස්ත්‍රීන්ට තම නිෂ්පාදන අලෙවි කරගැනීම සඳහා වෙළෙඳපොළ අවස්ථා නිර්මාණය කරන ප්‍රජාමූලික වැඩපිළිවෙළකි. තම නිවෙස් තුළ සීමා වී පවතින ස්ත්‍රීන්ගේ ශ්‍රමය සහ නිර්මාණශීලීත්වය පුළුල් වෙළෙඳපොළක් වෙත රැගෙන යාම එහි එක් අරමුණකි. එමඟින් ස්ත්‍රීන්ට තම නිෂ්පාදන සඳහා පාරිභෝගිකයන් සොයා ගැනීමටත්, තම ශ්‍රමයට ආර්ථික වටිනාකමක් ලබා ගැනීමටත් අවස්ථාව සැලසේ.
මෙම වෙළෙඳපොළ සමඟ සම්බන්ධ වී සිටින ස්ත්‍රීන්ගේ ව්‍යාපාර තවදුරටත් ශක්තිමත් කිරීමේ අරමුණින් Sisterhood විසින් ඔවුන් අතරින් පහළොස් දෙනෙකු තෝරාගෙන, තම ව්‍යාපාර අදාළ ප්‍රාදේශීය ලේකම් කාර්යාලයේ ලියාපදිංචි කරගැනීමට දිරිමත් කරන ලදී.
ව්‍යාපාර ලියාපදිංචිය සඳහා අවශ්‍ය උපදෙස් ලබාදීම, අදාළ ආකෘතිපත්‍ර සපයාදීම සහ ඒවා නිවැරදිව පුරවා ගැනීමට සහාය වීම මෙම වැඩසටහන යටතේ සිදුකෙරිණි. එසේම, ලියාපදිංචි කිරීමේ ක්‍රියාවලිය සඳහා අවශ්‍ය ආධාරක ලේඛන සකස් කරගැනීමට ද ඔවුන්ට පහසුකම් සලසන ලදී.
කුඩා පරිමාණයේ ව්‍යාපාරයක් පවත්වාගෙන යන ස්ත්‍රියකට වුවද එය විධිමත් ව්‍යාපාරයක් ලෙස සංවර්ධනය කරගැනීමේ හැකියාව තිබේ. එහෙත්, අවශ්‍ය තොරතුරු නොමැතිකම, පරිපාලන ක්‍රියාවලීන් පිළිබඳ අවබෝධයක් නොමැතිකම සහ ආයතනික කටයුතු සඳහා ප්‍රවේශ වීමේ දුෂ්කරතා හේතුවෙන් බොහෝ ස්ත්‍රීන්ට එම අවස්ථා අහිමි වේ. මෙම බාධක අවම කරමින් ස්ත්‍රීන්ට ඉදිරියට යාමට අවශ්‍ය සහාය ලබාදීම මෙම වැඩසටහනේ වැදගත් අරමුණකි.
Sisterhood හි අපගේ විශ්වාසය වන්නේ ස්ත්‍රීන්ගේ සැබෑ සවිබල ගැන්වීම සඳහා ඔවුන්ගේ අයිතිවාසිකම් පිළිබඳ දැනුවත්භාවය මෙන්ම ආර්ථික සම්පත්, වෙළෙඳපොළ අවස්ථා සහ ආයතනික සහාය වෙත ප්‍රවේශය ද තහවුරු කළ යුතු බවයි.
මෙම වැඩසටහන ද ස්ත්‍රීන්ගේ ආර්ථික නිදහස සහ ස්වාධීනත්වය වෙනුවෙන් අප ගන්නා උත්සාහයේ එක් පියවරකි. තමන්ගේම ව්‍යාපාරයක් ගොඩනඟා ගැනීමටත්, තම ශ්‍රමයේ වටිනාකම හඳුනා ගැනීමටත්, ආර්ථික තීරණ ස්වාධීනව ගැනීමටත් ස්ත්‍රීන්ට අවශ්‍ය පසුබිම සකස් කිරීම අපගේ අරමුණයි.
ස්ත්‍රීන්ගේ ආර්ථික ස්වාධීනත්වය යනු ඔවුන්ගේ නිදහස, අභිමානය සහ සමාජීය සමානාත්මතාව තහවුරු කිරීමේ අත්‍යවශ්‍ය කොටසකි.
