අභිසාරී: ලිංගික ශ්‍රමික ස්ත්‍රියගේ අයිතිවාසිකම් වෙනුවෙන් ස්ත්‍රීවාදී මැදිහත්වීමක්
අපගේ අරමුණ ලිංගික ශ්‍රමික ස්ත්‍රියකගේ ජීවිතය දෙස අනුකම්පාවෙන් පමණක් බැලීම නොව, ඇයගේ අයිතිවාසිකම් පිළිගන්නා, ඇයගේ හඬට සවන් දෙන සහ ඇයගේ මනුෂ්‍ය ගෞරවය ආරක්ෂා කරන සමාජයක් වෙනුවෙන් මැදිහත් වීමයි.
ස්ත්‍රීවාදී අදහස් සමාජගත කිරීමේ අරමුණින් නාගරික ප්‍රජාව වෙත ගෙන ගිය අපගේ චිත්‍රපට ප්‍රදර්ශන වැඩසටහන සඳහා Sisterhood විසින් තෝරාගනු ලැබුවේ ලිංගික ශ්‍රමික ස්ත්‍රියකගේ ජීවිතය ඇසුරින් නිර්මාණය වූ අභිසාරී චිත්‍රපටයයි. ගාල්ල නගරයේ ගාලු කොටුවේ පිහිටි ගාලු උරුමය ශාලාවේදී පැවැත්වූ මෙම ප්‍රදර්ශනයට ඉතා ඉහළ ප්‍රතිචාර ලැබිණි. විශේෂයෙන්ම, වීදි ආශ්‍රිතව ලිංගික ශ්‍රමයේ නිරත වන සහෝදරියන් පිරිසක් ඊට සහභාගි වීම මෙම මැදිහත්වීමේ සුවිශේෂී අත්දැකීමක් විය.
ලිංගික ශ්‍රමික ස්ත්‍රිය පිළිබඳ සමාජයේ පවතින සාකච්ඡාව බොහෝවිට සදාචාරය, ලිංගිකත්වය සහ සමාජ සම්මතයන් වටා ගොඩනැඟී ඇත. එහෙත් ස්ත්‍රීවාදී දෘෂ්ටිකෝණයකින් අප විමසිය යුත්තේ ඇයගේ ජීවිතය විනිශ්චය කිරීමට සමාජයට ඇති අයිතිය නොව, ඇයට සමාන අයිතිවාසිකම් සහිත මනුෂ්‍යයකු ලෙස ජීවත් වීමට සමාජය සහතික කරන්නේද යන්නයි.
පුරුෂයාගේ ලිංගිකත්වය බොහෝ අවස්ථාවල සාමාන්‍යකරණය කරන සමාජයක්, ලිංගික සේවා සපයන ස්ත්‍රියගේ ශරීරය සහ ජීවිකාව සදාචාරාත්මක විනිශ්චයකට ලක් කරයි. ලිංගික සේවා සඳහා ඉල්ලුමක් පවතින සමාජයක එම සේවාව සපයන ස්ත්‍රිය පමණක් අපකීර්තියට පත් කිරීම තුළ පවතින්නේ ගැඹුරු ස්ත්‍රී-පුරුෂ බල අසමානතාවකි. එමෙන්ම, ආර්ථික අසමානතාව, දරිද්‍රතාව සහ සුරක්ෂිත රැකියා අවස්ථා හිඟය වැනි ව්‍යුහාත්මක තත්ත්වයන්ගෙන් ලිංගික ශ්‍රමය පිළිබඳ තීරණ බලපෑමට ලක් විය හැකිය. එබැවින් සියලුම ලිංගික ශ්‍රමික ස්ත්‍රීන් එකම අත්දැකීමක් ලබන බව හෝ එකම හේතුවක් මත මෙම වෘත්තියට පිවිසෙන බව උපකල්පනය කළ නොහැකිය.
ශ්‍රී ලංකාවේ ලිංගික ශ්‍රමිකයන් පිළිබඳ ජාතික වාර්තාව ද පෙන්වා දෙන්නේ ඔවුන් නීතිමය, සමාජීය සහ ආර්ථික වෙනස්කම් කිරීම්වලට මෙන්ම ප්‍රචණ්ඩත්වයට ද මුහුණ දෙන බවයි. එබැවින් ලිංගික ශ්‍රමික ස්ත්‍රීන්ගේ අයිතිවාසිකම් පිළිබඳ සාකච්ඡාව සෞඛ්‍ය සේවා වෙත ප්‍රවේශ වීමෙන් පමණක් සීමා කළ නොහැකිය. තම ශරීරය පිළිබඳ තීරණ ගැනීමේ නිදහස, ආරක්ෂිත සේවා පරිසරයක්, සෞඛ්‍ය සේවා, නීතිමය සහාය, පොලිස් ප්‍රචණ්ඩත්වයෙන් ආරක්ෂාව සහ වෙනස්කම්වලින් තොරව ගෞරවාන්විතව ජීවත් වීමේ අයිතිය ද ඊට ඇතුළත් විය යුතුය.
මෙම අසාධාරණයේ බලපෑම ස්ත්‍රියගෙන් අවසන් නොවේ. ඇගේ දරුවෝ ද මවගේ වෘත්තිය හේතුවෙන් සමාජ අපහාසයට, පාසල් මට්ටමේ වෙනස්කම්වලට සහ සමාජයෙන් බැහැර කිරීමේ අවදානමට මුහුණ දෙති. මවගේ ජීවිකාව පදනම් කරගෙන දරුවකුගේ වටිනාකම හෝ අනාගතය විනිශ්චය කිරීම කිසිසේත් යුක්තිසහගත නොවේ. සෑම දරුවකුටම වෙනස්කම්වලින් තොර අධ්‍යාපනයක්, ආරක්ෂාවක් සහ ගෞරවාන්විත ළමා ජීවිතයක් හිමි විය යුතුය.
Sisterhood හි විශ්වාසය වන්නේ ස්ත්‍රීවාදී අරගලය සමාජය විසින් පිළිගනු ලබන ස්ත්‍රීන්ගේ අයිතිවාසිකම් වෙනුවෙන් පමණක් සීමා නොවිය යුතු බවයි. සමාජයේ ආන්තිකකරණයට ලක්වන ස්ත්‍රීන්ගේ හඬට ද ඉඩ සලසමින්, ඔවුන්ගේ අත්දැකීම් සහ අයිතිවාසිකම් පිළිබඳ සංවාදයක් ගොඩනැඟීම අපගේ වගකීමකි.
අභිසාරී චිත්‍රපට ප්‍රදර්ශනය එවැනි සංවාදයකට විවෘත වූ අවකාශයකි. අපගේ අරමුණ ලිංගික ශ්‍රමික ස්ත්‍රියකගේ ජීවිතය දෙස අනුකම්පාවෙන් පමණක් බැලීම නොව, ඇයගේ අයිතිවාසිකම් පිළිගන්නා, ඇයගේ හඬට සවන් දෙන සහ ඇයගේ මනුෂ්‍ය ගෞරවය ආරක්ෂා කරන සමාජයක් වෙනුවෙන් මැදිහත් වීමයි. සැබෑ ස්ත්‍රීවාදය යනු කිසිදු ස්ත්‍රියක් ඇයගේ ජීවිකාව, ලිංගිකත්වය හෝ සමාජ තත්ත්වය හේතුවෙන් අයිතිවාසිකම් අහිමි නොවන ලෝකයක් වෙනුවෙන් අරගල කිරීමයි.
