ස්ත්‍රීවාදී අදහස් ප්‍රචාරණය සඳහා චිත්‍රපට ප්‍රදර්ශනය: කටවහපං සිරියාවතී
ස්ත්‍රියකගේ හඬ ශක්තිමත් කිරීම යනු ඇයට කතා කිරීමට පමණක් අවස්ථාව ලබාදීම නොවේ. ඇය පවසන දේට සවන් දීම, ඇගේ අත්දැකීම් පිළිගැනීම සහ ඇගේ තීරණ ගැනීමේ අයිතියට ගරු කිරීම ද ඊට ඇතුළත් වේ.
ස්ත්‍රීවාදී අදහස් සමාජගත කිරීමේදී කලාව ප්‍රබල සන්නිවේදන මාධ්‍යයකි. විශේෂයෙන්ම ග්‍රාමීය ස්ත්‍රීන් අතර ස්ත්‍රී අයිතිවාසිකම් පිළිබඳ අවබෝධය වර්ධනය කිරීම සඳහා චිත්‍රපට ප්‍රදර්ශනය සහ ඒ ඇසුරින් සිදුකරන සාකච්ඡා වැදගත් වේ. ඒ අනුව, Sisterhood සංවිධානයේ ස්ත්‍රීවාදී අදහස් ප්‍රචාරණ වැඩසටහනේ පළමු චිත්‍රපටය ලෙස අප තෝරාගත්තේ කටවහපං සිරියාවතී නම් සිංහල කෙටි චිත්‍රපටයයි.
මෙම චිත්‍රපටය තුළින් නිරූපණය වන්නේ ගැහැනු ළමයෙකු ස්ත්‍රියක වීම නිසාම පවුල, පාසල සහ සමවයස් කණ්ඩායම් තුළ විවිධ වෙනස්කම් කිරීම්වලට හා පහත්කොට සැලකීම්වලට මුහුණ දෙමින් වැඩෙන ආකාරයයි. ඇය තමන්ට සිදුවන අසාධාරණයන් ප්‍රශ්න කරන සෑම අවස්ථාවකදීම ඇයට ලැබෙන පිළිතුර වන්නේ “කට වහපං සිරියාවතී” යන්නයි.
පසුව විවාහ වන ඇය සැමියාගෙන් විවිධ ආකාරයේ ප්‍රචණ්ඩත්වයන්ට ගොදුරු වෙයි. එයට එරෙහිව හඬ නැඟීමට උත්සාහ කරන සෑම අවස්ථාවකදීම ඇගේ හඬ නැවතත් යටපත් කෙරේ. අවසානයේදී ඇය පීඩනය දරාගත නොහැකිව සියදිවි හානි කරගත් පසු, ඇගේ මව සහ සැමියා ඇතුළු පිරිස මළසිරුර අසල සිට “අනේ කතා කරපං සිරියාවතී” යැයි විලාප නඟති. චිත්‍රපටයේ ප්‍රබලම උත්ප්‍රාසය ගැබ්ව ඇත්තේ එතැනය.
ස්ත්‍රීවාදී දෘෂ්ටිකෝණයෙන් බැලූ විට, සිරියාවතීගේ කතාව තනි ස්ත්‍රියකගේ ඛේදවාචකයක් පමණක් නොවේ. එය ස්ත්‍රියගේ නිහඬතාව අපේක්ෂා කරන පීතෘමූලික සමාජ ක්‍රමයක නිරූපණයකි. කුඩා කල සිටම කීකරු වීම, විරෝධය නොදැක්වීම සහ අසාධාරණය ඉවසා සිටීම ස්ත්‍රීත්වයේ ගුණාංග ලෙස උගන්වනු ලබයි. මෙහිදී ස්ත්‍රියගේ හඬ යටපත් කිරීම ඇගේ පුද්ගලික නිදහස සීමා කිරීමක් පමණක් නොව, ඇයට සිදුවන ප්‍රචණ්ඩත්වය අඛණ්ඩව පවත්වාගෙන යාමට ඉඩ සලසන සමාජ ක්‍රියාවලියක් ද වේ.
මෙම චිත්‍රපටය ග්‍රාමීය ස්ත්‍රීන් සමඟ සාකච්ඡා කිරීමේදී විශේෂ වැදගත්කමක් උසුලයි. මන්ද, ඔවුන්ට තමන්ගේ ජීවිතවල අත්දැකීම්, පවුල් සබඳතා සහ සමාජ අපේක්ෂාවන් මෙම කතාව තුළින් නැවත කියවා බැලීමට අවස්ථාව ලැබෙන බැවිනි. චිත්‍රපටය ඇසුරින් සිදුකරන සාකච්ඡා මඟින් අසාධාරණය ඉවසීම වෙනුවට එය ප්‍රශ්න කිරීමටත්, තමන්ගේ අයිතිවාසිකම් හඳුනාගැනීමටත් අවකාශය සැලසේ.
ස්ත්‍රියකගේ හඬ ශක්තිමත් කිරීම යනු ඇයට කතා කිරීමට පමණක් අවස්ථාව ලබාදීම නොවේ. ඇය පවසන දේට සවන් දීම, ඇගේ අත්දැකීම් පිළිගැනීම සහ ඇගේ තීරණ ගැනීමේ අයිතියට ගරු කිරීම ද ඊට ඇතුළත් වේ. සිරියාවතීට කතා කරන්නැයි ඉල්ලා වැළපීමට පෙර, ඇය ජීවත්ව සිටියදී ඇයට කතා කිරීමට ඉඩ දිය යුතුය. ස්ත්‍රීවාදී සමාජ පරිවර්තනයක අත්‍යවශ්‍ය පදනම වන්නේ එයයි.
